Наманганда алиментдан қарздор отанинг Ўзбекистондан чиқиш чеклови олиб ташланди. Бу ҳақда МИБ матбуот хизмати «Дарё»га хабар берди.
Фуқаролик ишлари бўйича Наманган туманлараро судининг 2018 йил 13 ноябрдаги буйруғига асосан Р.Сиддиқовдан 2 нафар фарзандининг моддий таъминоти учун алимент ундириш белгиланган ва қарздорнинг Ўзбекистондан чиқиш ҳуқуқлари вақтинча чекланган.
Алимент ундириш ҳақидаги ижро ҳужжати даврий ундирув ҳисобланганлиги сабабли алимент тўловчиларнинг хорижга чиқиш ҳуқуқлари вақтинча бекор қилинади. Агар вояга етмаган болалар таъминоти учун моддий таъминотни камида 5 йиллигини олдиндан тўласа, фуқародан четга чиқиш чеклови олиб ташланади.
Фуқаро Р.Сиддиқов ариза билан МИБ Наманган шаҳар бўлимига мурожаат қилиб, беш йиллик алимент пулларини ҳисоб-китоб қилишини сўраган. Ариза ўрганилиб, 2019 йил 1 апрелидан 2024 йилнинг 1 апрелига қадар алимент ҳисоб-китоб қилинган ва фуқаро 74,5 миллион сўм алимент тўлаши кераклиги белгиланган.
Р.Сиддиқов фарзандлари моддий таъминоти учун 74,3 миллион сўм тўлагани сабабли унга қўлланилган чекловлар бекор қилинган.
Аввалроқ Сурхондарёда хорижга чиқишни истаган ота 76 миллион сўм алимент тўлагани ҳақида хабар берилган эди.
Изоҳ (0)