Ҳокимият ёки мансаб ваколатини суиистеъмол қилишда айбланаётган Юнусобод тумани собиқ ҳокими вазифасини бажарувчи Бахтиёр Абдусаматов устидан олиб борилаётган суд ишининг навбатдаги мажлиси 6 май куни бўлиб ўтиши керак эди, бироқ бошқа кунга қолдирилди. Бу ҳақда «Дарё» мухбири хабар бермоқда.
1 май куни жиноят ишлари бўйича Тошкент шаҳар судида судья Зафар Нурматов раислигида Бахтиёр Абдусаматов, вақтинча ишсиз Ўлмас Муҳаммадсаидов ва Туризмни ривожлантириш давлат қўмитасининг «Миллий ПР-маркази» собиқ бош директори Шоҳрух Маликов иши бўйича суд мажлиси бўлиб ўтган эди. Иш бўйича навбатдаги суд мажлиси 6 май кунига белгиланган эди.
6 май куни Тошкент шаҳар суди маъмурияти суд жараёни 7 май кунига қолдирилганини маълум қилди. Суднинг ортга сурилиш сабаблари бўйича изоҳ берилмади.
Эслатиб ўтамиз, Бахтиёр Абдусаматов дастлаб Жиноят кодексининг 205-моддаси (ҳокимият ёки мансаб ваколатини суиистеъмол қилиш) ва 210-моддасида (пора олиш) кўзда тутилган жиноятларни содир этганликда айбланаётган эди. Бироқ 1 май куни бўлиб ўтган суд мажлисида Тошкент шаҳар прокурори ёрдамчиси Сардор Аҳмедов пора олиш тўғрисидаги айбловни бекор қилишни сўраган.
Ўшанда собиқ ҳоким Абдусаматов, жумладан, шундай деганди: «Бир нарсани айтишни хоҳлайман. Жиноят иши қўзғатилишидан бошлаб саккиз ой давом этган турли ҳаракатлар, айниқса тергов ҳаракатларигача — буларнинг барчаси ‘коррупцион сенсация’ учун қасддан Давлат хавфсизлик хизматининг айрим собиқ раҳбарлари томонидан амалга оширилди. Бу менинг тахминим».
Унинг таъкидлашича, оммавий ахборот воситаларида ҳокимнинг пора олаётганда қўлга олингани тўғрисидаги хабарлар ушбу тахминнинг асосий далилидир. Кимдир ёлғондан шон-шуҳратга эга бўлишни хоҳлаган ва бу иш ДХХ раисининг биринчи ўринбосари Жаҳонгир Эгамов ва бошқармаларнинг собиқ раҳбарлари томонидан амалга оширилган.
Изоҳ (0)