ОАВда Тошкентда тадбиркорлик билан шуғулланувчи Убайдулла ва Исматулла Баҳрамовлар Тошкент шаҳар ИИББ томонидан ноқонуний ҳибсга олинганлиги ва уларга нисбатан ноҳақ айблов қўйилаётганлиги ҳақида маълумотлар тарқалди. Шу муносабат билан Тошкент шаҳар ИИББ расман изоҳ берди.
ИИББ матбуот хизматига кўра, жорий йил 20 апрель куни 1985 йилда туғилган Убайдулла Баҳрамов ва 1987 йилда туғилган Исматулла Бахрамов Сурия давлати ҳудудидаги халқаро террористик ташкилотлар сафига қўшилиш мақсадида Тошкент халқаро аэропортига кетаётган вақтларида ҳуқуқни муҳофаза қилувчи идоралар ходимлари томонидан қўлга олинди.
Текширув давомида уларнинг ёнларидан «Тошкент — Истанбул» йўналиши бўйича 20 апрель кунги рейсга сотиб олинган авиабилетлар ва мобил телефонлари ўрнатилган тартибда расмийлаштириб олинди.
Вазирлар Маҳкамаси ҳузуридаги Дин ишлари бўйича қўмита хулосасига кўра, У. Баҳрамовнинг мобил телефонлари хотираларида ақидапарастлик ғоялари билан йўғрилган материаллар мавжудлиги аниқланди.
У. Баҳрамов ва И. Баҳрамовнинг ҳаракатларида Жиноят Кодексининг 244-2-моддаси 1-қисмида назарда тутилган жиноят таркиби мавжудлиги инобатга олиниб, уларга нисбатан жиноят иши қўзғатилди.
Тергов жараёнида мазкур шахсларнинг қонуний манфаатлари адвокат М.Парпиева томонидан ҳимоя қилиниб келинмоқда.
Изоҳ (0)