Сафарга чиқаётган одам учта муҳим нарсага эътибор қаратади: виза, чипта ва меҳмонхона / турар жой. Бу жиҳатлар Умра зиёратида ҳам муҳим ва уларни арзонлаштирса бўлади. Шоир ва таржимон Аъзам Обид Facebook’даги саҳифасида шу ҳақда фикр юритган.
Чипта: Муаллифга кўра, зиёратга бориб-келиш чиптаси тахминан 6,5-7 миллион сўм (770-830 доллар). Саудияга тўғридан-тўғри рейс ҳар куни учяпти. Турфирмалар орқали кетилса, «Ҳаво йўллари» учоқларида борса бўладими? Дубай, Деҳли ё Истанбул орқали ҳам чипта нархидаги фарқ жуда катта эмас, ҳатто баъзан арзонроқ.
Виза: Туристик агентлик ва умрага боришга ёрдам бермоқчи бўлган айрим «учарлар» виза учун тахминан 500-600 доллар сўрамоқда (виза хизмати ва ё виза учун бундай нарх дунёнинг ҳеч бир мамлакатида мавжуд эмас!). Саудия визани бепул деяпти, аммо турагентликлар ёки ҳукумат қандай виза хизмати ё ҳужжати учун пул олаётгани негадир шаффоф эмас. Масалан, компьютерда ишлаш, тегишли тилни биладиган одам виза анкетасини бемалол ўзи тўлдира олади. Анкета тўлдириб жўнатиш ва тасдиқланган визани эгасига юбориш учун шунча пул олиняптими?
Саудия Арабистони бепул деб кўрсатаётгн Умра визаси ва ё виза хизмати учун нарх бизда қандай белгиланяпти?
Меҳмонхона / турар жой: Ҳукумат ва турфирмалар негадир ҳашаматли турар жой таклиф этяпти. Саудияда ҳамма меҳмонхоналар уч, тўрт ё беш юлдузлими? Оддийроқ, арзонроқ хостелда турса бўлмайдими? Ният-мақсад чин дилдан ибодат ва ҳокисорлик билан муқаддас жойларни зиёрат қилиш бўлса яхши, юлдузли меҳмонхонада роҳатланиш эмас.
Оддий зиёратчига ўзбек ошпазлари тайёрлаган таомлар, 24 соатлик бепул тиббий хизмат, мамлакат рамзлари туширилган махсус либос, ибодат қўлланмаси, бейжик, замонавий транспортнинг қанчалик кераги бор?
Тиббий суғурта полисини олиш жуда осон, нари борса икки ҳафталик тур учун 50 доллар пул тўлайсиз. Зиёратга борган жойингизда ўша юрт ҳалол таомларидан татиб кўриш қизиқроқ эмасми? Ва ё ҳозир замонавий бўлмаган қандай транспорт бор? Volkswagen ё BMW эмас, оддий автобус ва арзонроқ такси хизматидан фойдаланса нега бўлмайди?
Зиёратга махсус рамз туширилган махсус либосда эмас, айтайлик, ўзимизнинг пахтадан тайёрланган тоза либослар, одмигина оппоқ футболкаларимизни кийса бўлмасми, ё ўзбеклигимизни албатта рамзлар орқали кўрсатиб юришимиз зарурми?
Саёҳат қилиш тажрибасига эга юртдошлар элликбоши ё юзбошисиз мустақил равишда оила аъзолари, дўстлари билан зиёратга отланишига рухсат берилса, бир ҳафталик зиёрат /ибодатга бориш харажати янада қисқарган ва кўпчилик учун анча енгиллик бўлган бўларди.
Эслатиб ўтамиз, олдинроқ Ўзбекистонда Умра сафари 1,3 миллион cўмга арзонлаштирилгани билдирилганди.
Изоҳ (0)