Ўзбекистон Президенти Сурхондарёдаги замонавий тикувчилик корхонаси ва инновацион кўчма кинотеатр лойиҳаси билан танишди
Ўзбекистон Президент Шавкат Мирзиёев 1 май куни Термиз шаҳридаги «ZIF Tekstil» масъулияти чекланган жамиятига ташриф буюрди. Бу ҳақда Ўзбекистон Президентининг расмий веб-сайтида хабар берилди.
Ушбу замонавий корхонани барпо этиш учун қурилиши тугалланмаган бино 16 миллиард сўм инвестиция киритиш шарти билан «нол» қийматда берилган эди. Зарур қурилиш-таъмирлаш ишлари амалга оширилиб, замонавий цехлар, омборхона ва маъмурий хоналар бунёд этилди. Германия, Италия, Туркиядан тикувчилик дастгоҳлари келтириб ўрнатилди. Мингга яқин янги иш ўрни яратилди.
Давлат раҳбари корхона фаолияти билан танишди, бу ерда ишлаб чиқарилган маҳсулотларни кўздан кечирди, мутахассис ва тикувчилар билан суҳбатлашди.
Ўзбекистон Президенти бу каби замонавий корхоналарни кўпайтириш, маҳсулотни экспорт қилиш зарурлигини қайд этди.
Корхона жорий йилда 29 миллион доллардан зиёд қийматдаги болалар ва катталар кийимлари, жинси шим ишлаб чиқариб, 8,8 миллион долларлик маҳсулотларни экспорт қилишни режалаштирган. 2021 йилда корхонанинг йиллик қуввати қарийб 50 миллион долларга етказилиб, 34,7 миллион долларлик экспорт мўлжалланмоқда.
Шу ерда «Жануб Текстиль» МЧЖнинг ип-калавадан тайёр маҳсулот ишлаб чиқариш кластери ҳамда Ўзбекистон—Ҳиндистон қўшма корхонасини ташкил этиш, Термиз туманидаги Султон Саодат зиёратгоҳини таъмирлаш ва ободонлаштириш, мамлакатнинг Австрия, Тожикистон ва Афғонистондаги дипломатик ваколатхоналари кўмагида инвестиция лойиҳаларини амалга оширишга оид тақдимотлар ўтказилди.
Шу ерда «Киномобиль» – Ўзбекистондаги биринчи инновацион кинотеатр лойиҳаси тақдимоти ўтказилди. Унинг ташаббускори «Cinema Servis» МЧЖ бўлиб, лойиҳа Ташқи иқтисодий фаолият миллий банки билан ҳамкорликда амалга оширилмоқда.
Кўчма кинотеатр MAN автомобили негизида ишлаб чиқилган, иситиш ва вентиляция тизими билан жиҳозланган. Томошабинлар фильмларни Dolby 5+1 товуш тизими билан 2D ва 3D форматларида томоша қилиши мумкин. Мобил кинотеатр 30 дақиқа ичида ишга тушади ҳамда 80 кишига хизмат кўрсатиш имкониятига эга бўлади.
