Урганч шаҳридаги умумий ўрта таълим мактабида ўқувчиларга йўл ҳаракати қоидаларини ўргатиш учун махсус ўқув синфи ташкил этилди. Бу ҳақда Хоразм вилояти ИИБ ходими подполковник З.Исмоилов «Дарё»га хабар берди.
Мамлакатда йўл ҳаракати хавфсизлигини таъминлаш, йўл-транспорт ҳодисаларининг олдини олиш мақсадида бир қатор тизимли ишлар амалга оширилмоқда.
Бундан бир ой илгари Хоразм вилояти ИИБ ва вилоят халқ таълими бошқармаси томонидан вилоят ҳудудидаги мактабларда йўл ҳаракати қоидаларини ўргатиш мақсадида алоҳида синф хонасини ташкил этиш ва уни кўргазмали-методик қўлланмалар билан жиҳозлаш юзасидан қўшма режа ишлаб чиқилган эди.
Ана шу режага асосан Урганч шаҳридаги 2-сон умумий ўрта таълим мактабида ўқувчиларга йўл ҳаракати қоидаларини ўргатиш бўйича илк махсус ўқув хонаси ташкил этилди.
Хоразм вилояти ИИБ Йўл ҳаракати хавфсизлиги бошқармаси мутахассисларининг методологик тавсияси асосида яратилган ушбу ўқув хонасида мактаб ўқувчиларининг йўл ҳаракати қоидалари бўйича билим ва кўникмаларини шакллантириш ва мустаҳкамлаш учун зарур шарт-шароитлар яратилган.
Алоҳида эътиборли томони шундаки, ўқув машғулотлари асосан йўл ҳаракати хавфсизлиги хизмати ходимлари томонидан олиб борилади.
2019 йил 30 апрель куни мазкур таълим муассасасига ташриф буюрган Хоразм вилояти ИИБ бошлиғи полковник Ш.Н.Рахмонов йўл ҳаракати қоидалари бўйича таълим бериш жараёнлари билан танишар экан, ўқувчиларга бу каби яратилаётган шарт-шароитлардан оқилона фойдаланиш, йўл ҳаракати маданиятини болаликдан эгаллаш тўғрисида тавсиялар берди.
Хоразм вилояти ИИБ бошлиғи томонидан ташриф якунида Урганч шаҳридаги 2-сон умумий ўрта таълим мактаби ўқувчилари ўртасида йўл ҳаракати қоидаларига риоя қилинишини тарғиб этишда фаол иштирок этиб келаётган ўқувчилардан бир гуруҳига «Фаҳрий ёрлиқ» ва бадиий китоблар, шунингдек, ушбу ўқув хонасини ташкил этиш ва жиҳозлашда фаоллик кўрсатган халқ таълими бўлими ва мазкур мактабнинг масъул ходимларига ташаккурномалар топширилди.
Бундан ташқари, мактаб кутубхонаси фонди учун ҳам бадиий китоблар тўплами тақдим қилинди.
Бу каби махсус синф хоналарини вилоятдаги мавжуд барча умумий ўрта таълим мактабларида ташкил борасидаги ишлар изчиллик билан олиб борилмоқда.
Изоҳ (0)