ДХХ Қашқадарёда тадбиркордан 4 минг доллар талаб қилган суғурта бўлими бошлиғини қўлга олди
Маҳаллий тадбиркорлардан бири Қарши шаҳрида озиқ-овқат маҳсулотлари сақлашга мўлжалланган совуткичли омборхона қуриш учун 1 миллиард сўм миқдорида кредит олиш мақсадида тижорат банкига мурожаат қилади. Бу ҳақда ЎзА хабар бермоқда.
Белгиланган тартибга кўра тадбиркорга банкдан кредит олиш учун дастлаб суғурта компаниясига мурожаат қилиши лозимлиги айтилади. Тадбиркор «Ўзбекинвест» суғурта компаниясининг Қарши шаҳар бўлими бошлиғи Собир Каримовга бориб учрашганида у 4000 доллар эвазига 1 миллиард сўм миқдорида кредит ажратилишига кўмаклашишни ваъда қилади.
Давлат хавфсизлик хизмати Қашқадарё вилоят бошқармаси ходимлари томонидан ўтказилган тезкор тадбирда Собир Каримов тадбиркордан 4 минг доллар олаётган вақтда ашёвий далиллар билан қўлга олинди.
Ҳозирда мазкур ҳолат юзасидан Собир Каримовга нисбатан Жиноят кодексининг тегишли моддаларига мувофиқ жиноят иши қўзғатилиб, тергов ҳаракатлари олиб борилмоқда.
