Москвадаги «Матросская тишина» тергов ҳибсхонасида икки маҳбус вафот этганидан сўнг Россия Жазони ижро этиш федерал хизмати (ФСИН) 26 апрелдан бошлаб Россия пойтахтидаги барча ҳибсхоналарни текширувдан ўтказади.
«Интерфакс»нинг ФСИНга асосланиб хабар беришича, «тақиқланган буюмларни аниқлаш мақсадида» ўтказиладиган навбатдан ташқари текширувлар тергов изоляторларининг барча хоналарини қамраб олади. Тинтувларда гиёҳванд моддаларни излашга ўргатилган хизмат итлари ҳам қатнашади.
24 апрелга ўтар кечаси «Матросская тишина» ҳибсхонасида маҳбусларнинг оммавий равишда гиёҳванд моддалар дозасини ошириб юбориши (передозировкаси) ҳолати қайд этилган. ФСИН вакиллари дастлаб икки киши вафот этган, яна икки киши касалхонага ётқизилганини маълум қилганди. Энди эса уч киши номаълум моддадан заҳарлангани айтилмоқда.
«Матросская тишина»да маҳбусларнинг наркотиклардан заҳарланиши ҳолати юзасидан мансабга совуққонлик билан қараш, мансаб мавқеини суиистеъмол қилиш ва гиёҳванд моддаларни қонунга хилоф равишда ўтказиш ҳолатлари бўйича жиноят иши очилган.
Москва шаҳрининг Инсон ҳуқуқлари бўйича вакили маълумотларига кўра, 2018 йили Россия пойтахтидаги тергов изоляторларида тўрт маҳбус вафот этган. Бу ўлимларнинг ҳеч бири наркотиклар билан боғлиқ бўлмаган.
Изоҳ (0)