Mercedes-Maybach элит автомобилларини ишлаб чиқарувчи Daimler компанияси ушбу русумдаги машиналар қандай қилиб Ким Чен Иннинг гаражига бориб қолганини билмаслигини маълум қилди. Бу ҳақда Meduza хабар бермоқда.
«Ушбу транспорт воситалари қандай қилиб Шимолий Кореяга бориб қолгани ҳақида ҳеч бир тасаввурга эга эмасмиз», — дея маълум қилди компания расмий вакили.
Daimler вакилларининг қайд этишича, компания Европа Иттифоқи ва АҚШнинг КХДРга нисбатан санкциявий қонунчилигига тўла амал қилади ва сўнгги 15 йилдан бери КХДР маъмурияти билан ҳеч қандай иш олиб бораётгани йўқ.
Ким Чен Ин халқаро саммитлар вақтида Пхеньяндан олиб келинадиган лимузинлардан фойдаланади. Владивостокда бўлиб ўтган ва Россия президенти Владимир Путин билан учрашувни ўз ичига олган шундай тадбирларнинг сўнггисида Ким иккита — Mercedes Maybach S600 Pullman Guard ва Mercedes Maybach S62 автомобилларидан фойдаланди.
Халқаро санкциялар, хусусан, БМТ санкциялари Шимолий Кореяга ҳашам маҳсулотларини етказиб беришни тақиқлайди — лимузинлар ҳам шундай маҳсулотлар категориясига киради.
Изоҳ (0)