Хонанда Жасур Умиров ўзи ёқтирган қизни унга эрга беришмаётгани учун ўз танишига таҳдид қилди ва 15 суткага қамалди

Жасур Умиров маст аҳволда 2018 йилнинг 18 ноябрь куни соат тахминан 3:00 да Captiva’сида таниши Ҳ.Қ.нинг хонадонига бориб, унинг дарвозасига бир неча марта машинанинг олд қисми билан урган. «Kun.uz»нинг ёзишича, қўшиқчи танишининг дарвозасига шикаст етказган, уни ҳақоратлаб, қўлидаги пичоқ билан қўрқитган.

Жасур Умировга нисбатан Маъмурий жавобгарлик тўғрисидаги кодекснинг 183-моддаси (майда безорилик, яъни жамоат жойларида уятли сўзлар билан сўкиниш, фуқароларга ҳақоратомуз шилқимлик қилиш ҳамда жамоат тартибини ва фуқароларнинг осойишталигини бузувчи шу каби бошқа хатти-ҳаракатларда ифодаланган жамиятда юриш-туриш қоидаларини қасддан менсимаслик) билан очилган суд иши 24 апрель куни Тошкент шаҳар Олмазор туман маъмурий суди томонидан кўриб чиқилган.

Судда хонанда айбига тўлиқ иқрор бўлган — ростдан ҳам ёнида олиб юрадиган пичоғи билан танишини қўрқитиб, ҳақоратлаганини тан олган. Сабаб сифатида ўзи ёқтирган Ш. исмли қизни унга турмушга беришмаётганини кўрсатган. Лекин қилган ишидан афсусдалигини билдириб, суддан енгиллик сўраган. Суд Жасур Умировни Маъмурий жавобгарлик тўғрисидаги кодекснинг 183-моддаси бўйича айбдор деб топиб, унга 15 суткалик маъмурий қамоқ жазосини тайинлаган.

26 апрель куни Тошкент шаҳар маъмурий суди хонанданинг ишини кўриб чиқиб, қуйи инстанция судининг қарорини ўзгаришсиз қолдирди.