Ўзбекистон – Қозоғистон давлат чегараси демаркацияси бўйича музокаралар бўлиб ўтди
22—26 апрель кунлари Гулистон шаҳрида Ўзбекистон — Қозоғистон қўшма демаркация комиссиясида икки давлат ҳукуматлари делегацияларининг навбатдаги йиғилиши бўлиб ўтди, бу ҳақда Ўзбекистон Ташқи ишлар вазирлиги хабар берди.
Учрашувда Ўзбекистон — Қозоғистон Давлат чегараси демаркациялаш лойиҳасининг якуний ҳужжатларини тайёрлаш бўйича муҳокамалар бўлиб ўтди.
Қозоғистон делегациясининг Ўзбекистонга ташрифи доирасида давлатлараро чегаранинг айрим ҳудудларида қўшма дала текширувлари ўтказилди.
Музокараларда, шунингдек, мамлакатнинг Тошкент ва Жиззах вилоятлари ҳамда Қозоғистоннинг Туркистон вилояти ўртасидаги чегаранинг айрим ҳудудларида демаркация чизиғини ўтказиш бўйича таклифлар юзасидан фикрлар алмашилди.
Музокаралар якуни бўйича икки давлат масъул вакиллари иштирокида баённома имзоланди.
Маълумот ўрнида, учрашувлар жадвалига биноан, навбатдаги йиғилиш Қозоғистон Республикаси ҳудудида бўлиб ўтади.
