Бир ҳафта аввал интернет тармоқларида Деҳқонобод туманининг Оқработ қишлоғи ҳудудидаги автомобиль йўлининг ўпирилиб тушгани акс этган суратлар тарқалганди. Қашқадарё йўллардан мунтазам фойдаланиш унитар корхонасига қарашли 161-йўл бўлими бошлиғи Норқул Кўчимов берган маълумотларга кўра, Оқработдаги ўпирилиб тушган ер М39 автомобиль йўлининг 1308-километри бўлган. «Дарё» мухбирининг хабарига кўра, 21 апрель куни кечки пайт М39 Тошкент—Термиз автомобиль йўлининг 1320-километрида ҳам ер ўпирилиб тушган. М39 йўлининг 1320 километри Бойсун тумани ҳудуди ҳисобланади.
«Дарё» мухбирининг 19 апрель куни Сурхондарё вилоятига сафари чоғидаги кузатувларига кўра, қарийб 150 метр баландликда жойлашган автомобиль йўлининг бир қисми ўпирилиб, силжиб тушаётган бўлган.
Маълум бўлишича, асфальт йўлнинг устида «булоқча» кўз очиб, сув оқишни бошлаган. Ўша булоқнинг кўз очиши айни ҳудуднинг 21 апрель куни ўпирилиб тушишига сабаб бўлган.
«Дарё» манбаси етказган суратлардан ҳудуддаги йўлнинг ўпирилиб тушгани ва айни пайтда йўлнинг қатнов қисми жуда торайиб қолганини кўриш мумкин.
Қатнов йўлининг торайиши оқибатида катта жарлик юзага келган. Бетон тўсиқлар билан тўсиб қўйилган йўлда айни дамда ҳеч қандай таъмирлаш ишлари олиб борилмаган кўринади.
«Ўзгидромет» маълумотига кўра, апрель ойида Бойсун туманида икки сутка давомида ёққан ёмғир миқдори деярли икки ойлик меъёрдан ошиб кетган.
Изоҳ (0)