МИБ ходимлари Тошкент вилоятида 2 нафар болани онасига қайтарди
Фуқаролик ишлари бўйича Тошкент вилояти Зангиота туманлараро судининг ижро варақасига асосан, 2018 йилда туғилган Умаралиев Абубакир Жасуровични, қарздор Ж.Гуламназиров қарамоғидан, ундирувчи А.Аугамбаева тарбиясига олиб бериш тўғрисидаги ижро ҳужжати Бюронинг Янгийўл туман бўлим иш юритувига келиб тушган бўлиб, шу куннинг ўзида ижро иши юритиш қўзғатилган. Бу ҳақда МИБ матбуот хизмати хабар берди.
Мазкур ижро ҳужжатининг ижросини таъминлаш мақсадида, қарздор рўйхатда туриб истиқомат қиладиган Янгийўл туманидаги манзилга борилганда, аввалига Ж.Гуламназиров болани онасига беришдан бош тортган.
Қарздор ва унинг укаси, ижро ҳаракатларини олиб боришга тўсқинлик қилиб, ҳақоратлаб, куч ишлатмоқчи бўлган. Шунга қарамай, бўлим давлат ижрочилари томонидан ундирувчи, холислар ва профилактика инспектори гувоҳлигида қизча онаси қўлига топширилди.
Яна бир шу каби ҳолат, суднинг ижро варақасига асосан тарафларнинг 2013 йилда туғилган Равшанова Муниса Достон қизини отаси, қарздор Д.Олимбоевнинг қарамоғидан, онаси, ундирувчи Н.Олимбоеванинг тарбиясига олиб бериш белгиланган.
Мажбурий ижро ҳаракатлари ҳақида қарздор ҳам хабардор қилинган эди. Шундай бўлса-да, яшаш манзилига чиқилганида, уйда бола йўқлиги сабаб, ижро ҳаракатлари кейинга қолдирилган ва бу ҳолат бир неча бор такрорланган.
Бюро давлат ижрочиларининг ҳаракатлари натижасида фарзанд ва уни бекитиб юрган ота топилган. Тегишли тартибда далолатнома расмийлаштирилиб, қарздордан тилхат олиниб, 2013 йилда туғилган қизча онаси, ундирувчи Н.Олимбоева тарбиясига олиб берилди.
