2019 йилнинг биринчи чораги мобайнида Андижон вилояти ички ишлар бошқармаси йўл ҳаракати хавфсизлиги бошқармаси ходимлари томонидан турли йўналишдаги 68 минг 613 та қоидабузарлик аниқланиб, расмийлаштирилган. Бу ҳақда вилоят ЙҲХБ «Дарё»га хабар берди.

Бошқарма бошлиғи, полковник Саидолим Зингировнинг маълум қилишича, 19 минг 707 марта қоидалар қўпол равишда бузилгани аниқланган. Шунингдек 627 та маст ҳолатда автомашина бошқариш, 3 минг 145 та тезликни ошириш, 10 минг 810 та одам ташиш қоидалари бузилган. Аниқланган қоидабузарликлар учун ундирилган жарималар миқдори жорий йилнинг шу кунига қадр 6 миллиард 141 миллион сўмни ташкил этган.

Жорий йилнинг ўтган даври давомида вилоятда 103 та йўл-транспорт ҳодисаси содир этилган бўлиб, оқибатда 20 киши бевақт ҳаётдан кўз юмган, 91 нафар йўловчи турли даражада тан жароҳати олган. Соҳа ходимлари томонидан олиб борилган профилактик тадбир натижасида йўл-транспорт ҳодисалари сони ўтган йилнинг шу даврига нисбатан 38 тага камайганлиги аниқланган.