Тошкентда 11 апрелдан патруль вертолёти пойтахт йўлларида Йўл ҳаракати қоидаларига риоя этилишини кузатиб бориши эълон қилинган эди. Бироқ, «Дарё» мухбирининг маълум қилишича, вертолёт парвози об-ҳаво ноқулайлиги сабабли номаълум муддатга қолдирилган.
Тошкент шаҳар ИИББ бошлиғи ўринбосари Азизхон Умаровнинг сўзларига кўра, пойтахт милицияси патруль учун Мудофаа вазирлигининг вертолётидан фойдаланмоқчи бўлган. Қайд этишларича, Ички ишлар вазирлиги келгусида видеокузатув ишларини амалга ошириш учун мўлжалланган иккита махсус вертолёт сотиб олишни режалаштирмоқда.
13 апрель куни Тошкент шаҳар ИИББда бўлиб ўтган брифингда маълум қилинишича, ИИВдан ташқари Соғлиқни сақлаш вазирлигига ҳам вертолёт берилиши мумкин. Вертолётларни айнан қайси ташкилот сотиб олиши ва бу ишлар қай тартибда амалга оширилиши ҳақида ҳозирча аниқ маълумот йўқ.
Маълумот учун, Президент Шавкат Мирзиёев январь ойида Юнусобод туманидаги 7-ички ишлар бўлимига ташрифи чоғида Тошкент шаҳар ИИББга замонавий вертолётлар ажратиш бўйича топшириқ берган эди. Бундан ташқари, Президент ҳукуматга 2020 йилга қадар санитар авиацияси учун ҳаво кемалари ёки авиация хизматларини сотиб олиш бўйича таклиф тайёрлаш ҳақида ҳам кўрсатма берган.
Изоҳ (0)