Аввал хабар берганимиздек, Шавкат Мирзиёев Сурхондарё вилоятига ташриф буюрди. Давлат раҳбари Термизда ўз ишини бошлаган Халқаро бахшичилик санъати фестивалининг тантанали очилиш маросимида иштирок этди ва нутқ сўзлади.
Ўзбекистонда биринчи бор ўтказилаётган ушбу санъат байрамида дунёнинг 74 та давлатидан 160 нафардан ортиқ киши қатнашмоқда. Улар орасида халқаро тузилмалар ва ҳукуматлар вакиллари, атоқли маданият арбоблари, фольклор санъати намояндалари, ОАВ ходимлари бор. Президент уларни самимий қутлади.
«Инсоният яратган бебаҳо маданият дурдоналари энг аввало ҳар қайси миллатнинг фольклор санъатида мужассам топгани ҳаммамизга яхши маълум. Турли халқларнинг миллий ўзлигини, уларнинг тили ва ҳаёт тарзини, анъана ва урф-одатларини ифода этадиган бахшичилик санъати умумбашарий маданиятнинг узвий қисми сифатида барчамиз учун қадрлидир.
Айни вақтда ҳозирги глобаллашув даврида, тижорат воситасига айланган ‘оммавий маданият’, шоу-бизнеснинг салбий таъсири тобора кучайиб бораётган мураккаб замонда ҳар қандай миллий маданиятнинг булоғи бўлган фолклор санъатига эътибор ва қизиқиш, афсуски, сусайиб бораётгани ҳам сир эмас.
Мана шундай ноёб ва буюк санъат бугунги кунда шунчаки маданий ёдгорлик намунасига айланиб, кўп жойларда унутилиб кетаётгани, ҳимоя ва муҳофазага муҳтож бўлиб тургани — бу ҳам давримизнинг аччиқ ҳақиқатидир. Бу ҳақиқат ушбу гўзал ва бетакрор санъатнинг чинакам фидойилари сифатида сиз, азизларни ҳаммадан кўра кўпроқ ташвишга солаётганига ишонаман.
Биз халқ ижодиётини, турли ўлкаларда бахши, жиров, оқин, манасчи, шоир, ошиқ каби номлар билан аталадиган, ўз тимсолида ҳам шоирлик, ҳам созандалик, ҳам хонандалик маҳоратини мужассам этадиган инсонларнинг нодир истеъдодини ҳар томонлама қўллаб-қувватлашимиз зарур. Бугун ўз ишини бошлаётган Халқаро бахшичилик санъати фестивали айни шундай улкан ва муҳим мақсадга қаратилганини алоҳида таъкидламоқчиман», деди Шавкат Мирзиёев.
Президентга кўра, бу борада, аввало, бахшичилик санъатининг илмий-назарий ва амалий асосларини чуқур ўрганиш ва мустаҳкамлаш, уни миллий маданиятнинг ўзига хос «ташриф қоғози»га айлантириш учун биргаликда жиддий иш олиб бориш керак.
Хусусан, бахшичилик соҳасида шаклланган ижодий мактаблар, «устоз — шогирд» анъаналарини қайта тиклаш ва ривожлантириш, бахши-шоирлар, фольклоршунос олимлар, ўқитувчи ва мутахассисларнинг ижодий ва илмий фаолиятини ҳар томонлама рағбатлантириш, маданият ва санъат муассасалари қошида бахшичилик тўгараклари ташкил этиш, бахши-шоирлар ижодига кенг йўл очиб бериш, тўй-томошалар, турли байрам ва маданий тадбирларда уларнинг доимий иштирокини таъминлаш, шу йўналишда халқаро ҳамкорликни кучайтириш, ўзаро тажриба алмашишни йўлга қўйиш, бахшичилик санъатини кенг тарғиб этиш учун ахборот-коммуникация технологияларидан, телевидение ва Интернет имкониятларидан самарали фойдаланиш, фолклор асарларининг аудио ва видео вариантларини кўпайтириш мақсадга мувофиқ.
«Агар биз бу ноёб санъатни сақлаб қолиш учун бугун барчамиз биргаликда ҳаракат қилмасак, эртага, афсуски, кеч бўлади, келгуси авлодлар, тарих бизни кечирмайди», деди давлат раҳбари.
Шавкат Мирзиёев бу борада Ўзбекистонда кейинги йилларда амалга оширилаётган ишлар ҳақида тўхталиб ўтди.
Мамлакатда халқ ижодиётини асраб-авайлаш ва юксалтириш мақсадида машҳур «Алпомиш» достонининг 1000 йиллиги кенг нишонланди. Бу улуғ бадиий обида шарафига муҳташам ҳайкал ўрнатилди. Самарқанд шаҳрида атоқли бахшилар хотирасига бағишланган ёдгорлик мажмуаси бунёд этилди. «Ўзбекистон Республикаси халқ бахшиси» фахрий унвони таъсис қилинди.
Термиз шаҳрида янги ташкил этилган бахшилар мактабида, республикадаги болалар мусиқа ва санъат мактабларида юзлаб ёшлар миллий фолклор санъатини ўрганмоқда. 100 томлик «Ўзбек халқ ижоди ёдгорликлари» мажмуаси нашр этилмоқда. Унинг 59 жилди айнан халқ достонларидан иборат. Шунингдек, кўп томлик «Қорақалпоқ фольклори» тўплами ҳам чоп этилди.
Бахши-шоирлар томонидан ижро этилаётган асарларни ёзиб олиш, уларни илмий ўрганиш ишлари мунтазам давом этмоқда. Соҳага оид китоб ва альбомлар, фильмлар ва телекўрсатувлар яратилмоқда. Бахшилар халқаро кўрик-танловларда, хорижий давлатларда ўтказилаётган Ўзбекистон маданияти кунларида муносиб иштирок этмоқда.
Шавкат Мирзиёев фестиваль ва унинг доирасида ўтказиладиган халқаро илмий-амалий конференция ишига муваффақиятлар тилади.
Изоҳ (0)