Аввал хабар берганимиздек, Шавкат Мирзиёев Термизда ўз ишини бошлаган Халқаро бахшичилик санъати фестивалининг тантанали очилиши маросимида иштирок этди.
Анжуман ўтказиладиган майдон атрофи байрамона безатилган. Бахшичилик санъатига оид кўргазмалар, миллий соз ва либослар, ўтов ва сўзаналар, тасвирий ва амалий санъат асарлари, китоблар, альбомлар намойиши ташкил этилган.
Президент очилиш маросимидан сўнг ушбу кўргазмалар билан танишди.
Қорақалпоғистон ва барча вилоятлардан келган фолклор жамоаларнинг чиқишларини томоша қилди, халқ ҳунармандчилиги маҳсулотларини кўздан кечирди.
Ижодкор ва ҳунармандлар билан суҳбатлашиб, келгуси ишларига муваффақият тилади.
Халқаро бахшичилик санъати фестивали икки йилда бир марта ўтказилади, достончилик санъатини асраб-авайлаш ва кенг тарғиб қилиш, турли халқлар ўртасида дўстлик ва ижодий ҳамкорликни мустаҳкамлашга хизмат қилади.
Бу йил биринчи марта ўтказилаётган фестивалда 74 мамлакатдан 160 нафардан ортиқ вакил қатнашмоқда.
Изоҳ (0)