Андижон шаҳрининг Боғишамол даҳасида «Хон» масъулияти чекланган жамият томонидан беш гектар майдонда бунёд этилган ҳайвонот боғи фойдаланишга топширилди. Бу ҳақда «Дарё» мухбири хабар бермоқда.
Уч йил мобайнида 12 миллиард сўмдан ортиқ жамият раиси Мухторжон Ҳалиловнинг ҳамда банкдан олинган кредит маблағлари ҳисобига катта ҳажмдаги қурилиш ва бунёдкорлик ишлари амалга оширилган.
Саксонга яқин қафасга турли қитъалардан келтирилган африка илонлари, тимсоҳлар, шерлар, гавая макакалари, эму товуси (Австралия), ўрдак ва оққушлар, шунингдек, ёпиқ павильонларга эса қушлар ҳамда сув ости жонзотлари олиб келиниб, парваришланмоқда. Ҳайвонот боғининг юқори қисмида эса келган меҳмонлар учун турли кўринишдаги аттракционлар, салқин ичимликлар ва музқаймоқ кафеси, автодром, батут мажмуаси, дорбозлар майдони ҳам қурилган.
Очилиш маросимида иштирок этган кам таъминланган оила фарзандлари, болалар шаҳарчасида тарбияланаётган, жами 700 нафарга яқин кичкинтойлар ҳайвонот боғининг биринчи меҳмонлари бўлди.
Эслатиб ўтамиз, 2018 йил 30 декабрь куни Андижон вилоятининг Хўжаобод туманидаги ҳайвонот боғида шерлар қоровулни ғажиб ташлаганди.