Ўзбекистонда илк Хотин-қизлар тадбиркорлик маркази иш бошлади (фото)
28 март куни Бухоро вилоятида Ўзбекистонда илк хотин-қизлар тадбиркорлик маркази иш бошлади, дея хабар беради «Дарё»га Хотин-қизлар қўмитаси матбуот хизмати.
Марказ Ўзбекистонда биринчи Хотин-қизлар тадбиркорлик маркази бўлиб, у Ўзбекистон Республикаси Президентининг 2019 йилнинг 7 март куни имзолаган «Хотин-қизларнинг меҳнат ҳуқуқлари кафолатларини янада кучайтириш ва тадбиркорлик фаолиятини қўллаб-қувватлашга оид чора-тадбирлар тўғрисида» қарорига асосан ташкил қилинган.
Марказ аёлларнинг бизнес юритиш кўникмаларини шакллантиради, уларга маслаҳатлар беради ва амалий ёрдам кўрсатади. Шунингдек узоқ муддат бола парваришлаш таътилида бўлган, мушкул иқтисодий аҳволга тушган аёлларни касблар бўйича қайта тайёрлашга ҳам кўмаклашади.
Тадбиркорлик билан шуғулланиш истагини билдирган хотин-қизлар туман (шаҳар) ҳокими ва хотин-қизлар қўмитаси томонидан шакллантириладиган рўйхат асосида махсус ўқитиш дастури бўйича ўқитилади. Maxсус дастурларни муваффақиятли ўзлаштирганларга туман (шаҳар) хотин-қизлар қўмитаси тавсиясига кўра тадбиркорлик фаолиятини йўлга қўйиш учун имтиёзли кредит берилади.
Бунинг учун Хотин-қизларни ва оилани қўллаб-қувватлаш жамоат фонди банкларга ҳар йили 100 миллиард сўм ажратади, унинг камида ярми қишлоқ жойлардаги хотин-қизларнинг бизнесини ривожлантиришга йўналтирилади.
