Жорий йилнинг куз ойида «Мисс Олмаота» гўзаллик танловининг турли йиллардаги ғолиблари ўртасида ўзаро беллашув ўтказилади. Бу ҳақда «Zakon.kz» хабар берди.
Хабарда айтилишича, олмаоталик қизлар Қозоғистонда энг чиройли ҳисобланади. Қолаверса, «Дунё гўзали» танловида ғолиб бўлган ягона қозоғистонлик қиз ҳам олмаоталик бўлган.
«Мисс Олмаота» танлови ташкилотчилари турли йиллар давомида танловда ғолиб бўлган қизлар орасидан энг чиройли ва энг қобилиятлисини танлаб олишга қарор қилган.
«Сентябрь ойида «Мисс Олмаота» танловининг гранд-финалини ўтказишни режалаштиряпмиз. Биз турли йиллар давомида Мисс унвонига сазовор бўлган барча қизларни таклиф этамиз ва катта саҳнада бу лойиҳани амалга оширамиз. Дунёнинг ҳали ҳеч бир давлатида бундай танлов ўтказилмаган», — дейди «Мисс Олмаота» гўзаллик танловининг бош директори Совет Сеитов.
Ҳозирда миссис бўлган «Мисс Олмаота» танловининг дастлабки ғолиблари орасидан ташкилотчилар мисс унвонига лойиқ бўлган турмушга чиқмаган ва фарзандлари бўлмаган қизларни лойиҳага таклиф қилади.
Совет Сеитовнинг сўзларига кўра, бунга асосан, сўнгги беш йил давомида танловда ғолиб бўлган қизлар мос келади.
Изоҳ (0)