Ёшлар иттифоқи, Ўзбекистоннинг Германиядаги элчихонаси ҳамда Ўзбекистон ёшлари умумжаҳон ассосацияси ҳамкорлигида Берлинда «Германияда Ўзбекистон ёшлари куни» мавзуида маънавий-маърифий тадбир ташкил этилди. Бу ҳақда «Дарё»га Ёшлар медиа маркази маълум қилди.
Тадбир давомида Ўзбекистоннинг Германиядаги Фавқулодда ва мухтор элчиси Набижон Қосимов, Ўзбекистон ёшлари умумжаҳон ассосациясининг Германиядаги вакили Камолиддин Бердиев бугунги кунда мазкур мамлакатда таҳсил олаётган ўзбекистонлик ёшлар ва уларнинг таълим жараёнида фаолликлари ҳақида мулоҳазаларини билдириб ўтди.
Туризмни ривожлантириш қўмитаси бошқарма бошлиғи Ўткир Саидов томонидан Ўзбекистоннинг туристик салоҳиятига бағишланган видеолавҳа намойиш этилди.
Тадбир иштирокчилари ва ташкилотчилар ўртасида уюштирилган жонли мулоқот ҳам қизғин баҳс-мунозараларга бой бўлди.
Шу куни «Ўзбегим» миллий рақс ансамблининг чиқишлари, талабалар иштирокида саҳналаштирилган «Келин салом», айтишув, арқон тортиш ўйинлари ўтказилди.
Тадбир якунида ташкилотчилар томонидан иштирокчиларга эсдалик совғалари топширилди.
Изоҳ (0)