Ўзбекистоннинг Франкфурт-Майн шаҳридаги бош консулхонаси ҳамда Туризмни ривожлантириш қўмитаси томонидан шаҳарда Наврўз муносабати билан байрам тадбирлари ташкил этилди. Уларда 400 нафардан ортиқ сиёсат, иқтисодиёт, маданият доиралари, жамоатчилик ва ОАВ вакиллари қатнашди.
Тадбирнинг расмий очилишида сўзга чиққан Франкфурт-Майн шаҳри ҳокимининг ўринбосари Сильвия Вебер иштирокчиларни Наврўз билан табриклаб, Ўзбекистоннинг бой маданияти, тарихи, урф-одатлари, анъаналари ва туризм салоҳиятини юқори баҳолади. Бу каби тадбирлар немис ва ўзбек халқлари ўртасида ўзаро бағрикенглик ва дўстлик алоқаларини ҳамда туризм соҳасида ҳамкорликни мустаҳкамлашда муҳим ўрин тутишини таъкидлади.
Тадбир давомида Туризмни ривожлантириш қўмитаси кўмагида ижодий сафари ташкил этилган «Тасанно» мусиқий гуруҳи чиқишлари хорижлик меҳмонларда Ўзбекистон санъати ва маданияти ҳақида илиқ таассурот қолдирди. Шунингдек, тадбирда халқ ҳунармандчилиги намуналари намойиш этилди ҳамда иштирокчиларга Ўзбекистоннинг туризм салоҳиятига оид немис тилида турли тарғибот материаллари тарқатилди.
Бундан ташқари, Наврўз таомлари бўлган сумалак, ҳалим, кўксомса, палов ва бошқа таомлар тайёрланиб, тадбир иштирокчиларга улашилди.