Наврўз байрами муносабати билан Хоразм вилоятининг барча ҳудудларида, корхона ва ташкилотларда «Наврўзинг муборак, Ўзбекистоним!» шиори остида маънавий-маърифий тадбирлар ўтказилмоқда.
Наврўз байрамини кўтаринки кайфиятда кутиб олиш, аҳолига қулайлик яратиш мақсадида асосий турдаги қишлоқ хўжалик маҳсулотларининг арзонлаштирилган ярмаркаларини ташкил этиш анъанага айланган. Унга мувофиқ, айни пайтда жойларда байрам ярмаркалари ташкил этилмоқда. Биргина Урганч шаҳрида жойлашган Марказий деҳқон бозори ҳудудидаги Наврўз байрами ярмаркасида вилоятнинг барча туманлари учун алоҳида расталар ажратилган бўлиб, бу ерда қайта ишлаш корхоналари, кичик бизнес ва хусусий тадбиркорлик субъектлари, чорвачилик, паррандачилик, балиқчилик ҳамда асаларичиликка ихтисослашган хўжаликлар, деҳқонлар она заминимизда етиштирилган турли хил озиқ-овқат ва қишлоқ хўжалиги маҳсулотлари билан аҳолига хизмат кўрсатмоқда. «Наврўз байрами ярмаркалари» расталарида 26 турдаги озиқ-овқат ва қишлоқ хўжалиги маҳсулотлари аҳолига арзон нархларда таклиф этилмоқда. Байрам ярмаркаларида маҳсулотлар нархининг бозорга нисбатан арзонлиги аҳолига бирдек манзур бўлмоқда. 
«Бугунги ярмаркада оиламиз учун зарур бўлган маҳсулотларни арзон нархларда харид қилдик. Наврўз байрами арафасида концерт дастурлари ва аҳоли учун қулай ярмаркаларни ташкил этилганидан жуда хурсандмиз. Ҳар кунимиз Наврўз бўлсин», — дейди Янгибозор туманидан Назокат Машарипова. 
Ўзбекистон Республикаси Бош прокуратураси ҳузуридаги Иқтисодий жиноятларга қарши курашиш департаменти Хоразм вилояти бошқармаси, вилоят ҳокимлиги ва бошқа мутасадди ташкилотларнинг амалий кўмаги билан вилоятда ташкил этилган савдо ярмаркаларида аҳолига қулай савдо шароитини яратишга ҳамда тўловни пластик карточкалар орқали ҳам амалга оширишга алоҳида эътибор қаратилмоқда. Яна бир эътиборли жиҳати байрам ярмаркаларида театр ижодкорларининг саҳна кўринишлари, халқ бахшилари ва бошқа санъат усталарининг концерт дастурлари, куй-қўшиқлар, ўлан-у лапарлар юртдошларимиз билан бирга Хоразмга ташриф буюрган хорижлик меҳмонларга ҳам хуш кайфият бағишламоқда. 
«Ўзим Америкаликман. Яқинда Урганч давлат университетига таълим бериш учун келдим. Наврўз байрамини биринчи кутиб олишим. Бу ердаги тўкин сочинликни кўриб ҳайратландим. Айниқса менга ширин меваларингиз, сумалак ва баҳорий таомларингиз жуда ёқди. Хоразмда Наврўзни кутиб олаётганимдан хурсандман. Аҳолининг юзидаги табассум, бир бирига бўлган меҳр ришталари менга қувонч бағишлади. Айниқса савдо ярмаркасида ташкил этилган концерт дастурларида хоразмча Лазги рақсини мириқиб томоша қилдим», — дейди профессор Мина Гавел.