Аюб Шаҳобиддинов «Олтин ҳумо» тақдимотида қатнашмагани сабаби ва «Рангсиз тушлари» ҳақида

Ўзбекистон Киноарбоблари ижодий уюшмаси томонидан ўтказилаётган «Олтин ҳумо» миллий кинотақдимотининг саралаш босқичи якунига етди.

Журналист Феруз Муҳаммад сарлаш босқичи қандай ўтганлиги ҳақида саралаш комиссияси аъзоси, кинорежиссёр Аюб Шаҳобиддиновнинг фикрлари билан қизиқди.

Режиссёр «Олтин ҳумо» миллий кинотақдимотининг саралаш босқичи, тақдимотда қатнашмаслиги сабаби ва «Рангсиз тушлар» деб номланган фильми ҳақида гапириб берди.

Саралаш босқичида турли-туман фильмлар бор. Тақдимот айнан шу жиҳати билан ҳам қизиқ бўлса керак деб ўйлайман. Саралаш босқичининг вазифаси тақдимотда белгиланган 16 номинация бўйича, бештадан номзодни танлаб, кейинги босқичга тақдим қилишдан иборат. Ушбу тақдимотнинг аҳамиятли жиҳатларидан яна бири, ҳужжатли ва анимацион фильмлар ҳам тақдимотда иштирок этмоқда. Ҳужжатли ва анимацион фильмларга бошқа тақдимотларда кўпинча урғу берилмас эди. Қолаверса, ҳужжатли ва анимацион фильмлар ижодкорлари бошқа номинациялар бўйича ҳам ғолибликка давогар бўлиши мумкин.

Ташкилий қўмита аъзолари ‘Олтин ҳумo’ миллий кино тақдимотини катта кино байрам бўлиши учун тинимсиз меҳнат қилишмоқда.

‘Олтин ҳумo’ миллий кинотақдимотида ўзим иштирок этмаяпман. Бунинг биринчи сабаби, фильмлари тақдимотга қўйилган ижодкорлар саралаш комиссиясида эксперт сифатида иштирок этишмайди. Бундан ташқари сўнгги тўрт йилда тўлиқ метражли бадиий фильм суратга олмадим. Яқин кунларда ‘Ўзбеккинo’ МА сценарий топширдик. ‘Рангсиз тушлар’ деб номланган мазкур фильм бир аёлнинг реализибацияси ҳақида бўлиб, анча йиллар аввал жиноятга қўл уриб, 17 йил деганда ўз уйига қайтиб, маълум бир зиддиятларга дуч келиши, оиласи билан бўлган муносабатлар, ички тозаликка, софликка интилиши ҳақида.

Аюб Шаҳобиддинов, Ўзбекистонда хизмат кўрсатган маданият ходими, режиссёр