«Ёш коинот гўзали» танловининг собиқ ғолиби 20 ёшга тўлиши арафасида ҳаётдан кўз юмди

Ўсмирлар ўртасида ўтказилган «Ёш коинот гўзали» танловининг собиқ ғолиби Лотте Ван Дер Зи юрак хуружидан вафот этди. Бу ҳақда Sputnik хабар бермоқда.

The Sun нашрига кўра, голландиялик модель оиласи билан Австриядаги тоғ-чанғи курортида дам олаётган бўлган. Ўлимидан бир кун олдин ўтиришдан келган, бироқ соғлигидан шикоят қилмаган. Эрталаб хонасидан чиқмаганидан сўнг ундан хабар олгани кирган ота-онаси қизни хонасидан беҳуш ҳолда топган.

Шифокорлар Лоттени сунъий кома ҳолатига тушириб, Мюнхенга олиб борди. У шу ерда ҳаётдан кўз юмди. Эртасига, 7 март куни Лотте 20 ёшни қаршилаши керак эди.

Ҳозирда шифокорлар юрак хуружига олиб келган сабабларга аниқлик киритмоқда.