Ўзбекистон Wanderlust World Guide Awards талқини бўйича «Энг тез ривожланаётган сайёҳлик йўналиши» деб топилди

Лондонда Британиянинг машҳур Wanderlust журнали талқини бўйича туризм соҳасида Wanderlust World Guide Awards мукофотларини топшириш маросими бўлиб ўтди. Журнал туризм саноатидаги ҳодисаларни ёритишга ихтисослашган, деб ёзади «Podrobno.uz».

Ғолиблар журнал муштарийларининг «Ташриф буюриш учун энг оммабоп давлат», «Энг тез ривожланаётган сайёҳлик йўналиши», «Сайёҳлар учун энг оммабоп шаҳар», «Энг яхши авиакомпания» ва «Энг яхши туроператор» номинациялари бўйича овоз бериши орқали танланди.

Жорий йилда танловда турли номинациялар бўйича Намибия, Япония, Янги Зеландия, Эрон, Лаос, Сингапур, БАА, Буюк Британия ва Испания ғолиб бўлди.

Давлат туризм қўмитасининг маълум қилишича, Ўзбекистон «Энг тез ривожланаётган сайёҳлик йўналиши» (Тор emerging destination) номинациясида ғолиб деб эълон қилинган. Овоз бериш давомида республика Самарқанд, Бухоро ва Хиванинг бой маданий-тарихий мероси, шунингдек, сайёҳлик бозорини ривожлантириш бўйича қабул қилинаётган чора-тадбирлар туфайли Эронни ортда қолдиришга эришган.