Деҳқонободдаги қорли йўлда иккита Nexia ва юк машинаси иштирокида ЙТҲ содир бўлди (фото)

Қашқадарё вилояти Деҳқонобод туманининг «Оқработ» қишлоғида 20 февраль куни тонгги соат 6:00 да иккита Nexia ва Isuzu юк машинаси иштирокида йўл транспорт ҳодисаси содир бўлди. ЙТҲ юз берган вақтда йўл қор билан қопланган бўлган. Бу ҳақда «Дарё»га Деҳқонобод туман Ички ишлар бўлими навбатчи ёрдамчиси Нуриддин Очилов маълум қилди.

Қашқадарё вилоят ИИБ матбуот хизматининг «Дарё»га қўшимча қилишича, Сурхондарё вилояти, Олтинсой тумани яшовчи 1989 йилда туғилган Ш.М. бошқарувидаги Nexia М39 Тошкент–Термиз йўлининг 1314-километрида ҳаракатланиб келиб, олдиндаги қумқўрғонлик ҳайдовчи 1984 йилда туғилган Н.Х. бошқарувидаги Nexia’ни қувиб ўтишга киришган. Шу пайт Nexia қарама-қарши йўналишда ҳаракатланиб келаётган, деновлик 1992 йилда туғилган А.Т. бошқарувидаги Isuzu юк машинаси билан тўқнашган.

«Xabar.uz» нашрида эълон қилинган суратда Nexia’лардан бирининг олд томони пачоқланиб кетгани, орқа томони эса иккинчи Nexia’нинг устига чиқиб қолганини кўриш мумкин.

ЙТҲ оқибатида Nexia йўловчиси 1998 йилда туғилган О.А. тан жароҳати олиб туман шифохонасига ётқизилган. Ҳодиса оқибатида бошқа жароҳат олганлар йўқ.