15 февраль – «Халқаро саратонга чалинган болалар куни»ни нишонлаш мақсадида Республика онкология марказида ёшлар, эстрада юлдузлари, кино ва театр актёрлари, футболчилар жам бўлди. Бу ҳақда «Дарё»га Ёшлар медиа маркази маълум қилди.
Ўзбекистон ёшлар иттифоқи ҳамда «Мўъжизалар даври» ёшлар жамоаси томонидан ўтказилган тадбирда болажонлар машҳур меҳмонлар билан кўришиб, рақслар шоуси, қизиқарли ўйинлар, цирк томошаларидан баҳраманд бўлди.
— Ҳаётнинг ширинлиги, умр мазмуни, албатта, болалар билан. Уларнинг бир кунини бўлса-да, қувончга тўлдирганлар орасида борлигимдан хурсандман, — дейди актёр Жавоҳир Зокиров.
Хонанда Шаҳзода ҳам болалар қувончига шерик бўлиб, дастхати туширилган ва тилаклари битилган совғаларини улащди.
«Мўъжизалар даври» ёшлар жамоаси аъзолари ҳайвонлар, гуллар, мультфильм қаҳрамонлари акс эттирилган ранг-баранг расмларга эзгу тилаклар ва яхши ниятлар ёзиб, болаларга тақдим этди.
Шу куни болаларга турли ташкилотлар томонидан ҳам совғалар топширилди.
Изоҳ (0)