Сурхондарё вилоятининг Жарқўрғон туманида 3 февраль куни ҳуқуқни муҳофаза қилувчи орган ходимлари томонидан ўтказилган тезкор тадбир натижасида одам савдоси билан боғлиқ жиноят аниқланди. Бу ҳақда Ўзбекистон ИИВ Жамоатчилик ва оммавий ахборот воситалари билан алоқалар бошқармаси хабар бермоқда.
Бош прокуратура матбуот хизматидан маълум қилишларича, Фарғона вилояти Бешариқ туманида яшовчи Д.Б. исмли аёл ўзининг шахсини яшириб, фуқаро М.га тегишли паспорт нусхаси билан 26 январда Сурхондарё вилояти Жарқўрғон туманида туғуруқхонага жойлашган.
«Шу куни қиз фарзандли бўлиб, 3 февраль куни чақалоғини С.А. исмли аёлга 3,5 миллион сўмга сотиб кетаётган вақтида ушланган», — дейилади Бош прокуратура ахборотида. ИИВ ахборотида қайд этилишича, фарғоналик аёл боласини сотиб, Тошкент шаҳрига қайтиб кетаётган вақтида қўлга олинган.
Бош прокуратура матбуот хизматининг қўшимча қилишича, мазкур ҳолат юзасидан Д.Б.га нисбатан Жиноят кодексининг тегишли моддалари билан жиноят иши қўзғатилиб, тергов ҳаракатлари олиб борилмоқда.
Изоҳ (0)