«Яндекс» сериал ишлаб чиқариш билан шуғулланмоқчи

Россиянинг «Яндекс» интернет-компанияси оригинал сериал ишлаб чиқаришни бошлайди. Бу ҳақда Meduza хабар берди.

Интернет-компания ҳозирда киностудиялар билан фаол музокаралар олиб бормоқда ва уларга саккизтадан ўнтагача теледастур буюртма қилиш ниятида.  Биринчи лойиҳалар 2020 йил бошларида намойиш этилади.

Ҳозирда иккита лойиҳа бўйича якуний келишувларга эришилган. Уларнинг биринчиси «Среда» телекомпаниясининг «Вазирлик» сериали. Унга Роман Волобуев режиссёрлик қилган. Сериал амалдорлар ва коррупция муаммоларига бағишланган. Иккинчи сериал эса Марс Медиа компаниясининг «Водопровод» детектив сериали. Андрей Стемпковский томонидан суратга олинмоқда.

«Яндекс» компанияси ушбу лойиҳани «Кинопоиск» базасида ўз онлайн кинотеатрини ривожлантириш ҳамда пуллик абонентлар сонини кўпайтириш учун амалга оширмоқда, дейилади хабарда.