Сурхондарё вилоятининг Олтинсой тумани, Хўжасоат қишлоғида Ўзбекистон халқ ёзувчиси Тоғай Мурод маҳалла марказининг тантанали очилиш маросими бўлиб ўтди. Бу ҳақда ЎзА хабар берди.
Ёзувчи камолга етган қишлоқда унинг хотираси абадийлаштирилиб, Узумзор маҳалласига Тоғай Мурод номи берилди. Маҳаллада 1 миллиард 567 миллион сўм маблағ эвазига барча шароитларга эга Тоғай Мурод маҳалла маркази бунёд этилиб, замонавий усулда жиҳозланди.
Янги марказда адиб номи билан аталувчи маҳалла фуқаролар йиғини идораси, музей, кутубхона ва ўқув зали, фаоллар зали барпо этилган.
Кўркам мажмуа сифатида қад ростлаган янги бинода профилактика инспектори ва тез тиббий ёрдам бўлимига ҳам алоҳида хоналар ажратилиб, барча қулайликлар яратилган.
— Ўтган йили суюкли адибимизнинг 70йиллик юбилейини кенг нишонлаганимизда ул зотнинг номини абадийлаштириш йўлида бир қатор ишларни амалга оширишни мақсад қилгандик, — дейди Олтинсой тумани ҳокими Э.Бойниёзов. — Шунга мувофиқ ёзувчи униб-ўсган маҳаллага Тоғай Мурод номи берилиб, маҳалла маркази қурилди. Уй-музейи ташкил этилди. Эндиликда Тоғай Мурод боғини барпо этиш режамиз бор.
Тоғай Мурод маҳалла марказининг фаоллар залида ёзувчи таваллудининг 71 йиллигига бағишланган адабий учрашув ҳам ўтказилди. Ёзувчилари уюшмаси, туман ҳокимлиги ва бошқа ташкилот, корхоналар томонидан янги кутубхонага кўплаб китоблар совға қилинди.
Изоҳ (0)