Эмилиано Сала учган самолёт қолдиқлари топилди (фото)
«Кардифф» ҳужумчиси Эмилиано Сала учган саломётни қидириш бўйича янги тафсилотлар маълум қилинди.
Sky Sports’нинг хабар беришича, бортида Эмилиан Сала бўлган Piper PA-47 Malibu самолёти қолдиқлари топилган. Бу ҳақда аллақачон Сала ва учувчи Дэвид Айбботсоннинг яқинларига хабар берилди.
Гернси оролларига яқин жойлашган Ла-Манш бўғози ҳудудида самолёт қолдиқлари топилган. Аммо футболчи ва учувчи ҳамон топилгани йўқ.
Эслатиб ўтамиз, 3 февраль куни сувости қидирув ишлари бошланганди. Хусусий қидирув операцияси GoFundMe краудфандинг платформасида йиғилган маблағлар ҳисобидан молиялаштирилмоқда. Айни вақтда 300 минг евродан ортиқ маблағ йиғилган.
24 январь куни Гернси полицияси Сала учган самолётни қидириш ишларини тўхтатганди.
Саланинг трансфери «Кардифф» учун рекорд суммага айланди. Аргентиналик футболчи Уэльс клуби билан келишувга эришиб, «Нант» клубидаги собиқ жамоадошлари билан хайрлашиш мақсадида Францияга келганди. Қайтишда эса унинг самолёти ҳалокатга учрганди. У билан бирга самолётда учувчи Дэвид Айбботсон ҳам бўлган.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @daryo_sport’га обуна бўлинг!
