Жаҳонгир Ортиқхўжаев: Akfa бошқарувини шогирдларимга топширганман, лекин компания акцияларига эгалик қиламан

Бугун, 31 январь куни Tashkent city халқаро ишбилармонлик марказида ОАВ ходимлари учун пресс-тур ва матбуот анжумани ташкил этилди. Бу ҳақда «Дарё» мухбири Севара Нишонова хабар берди.

Матбуот анжуманида Тошкент шаҳар ҳокими Жаҳонгир Ортиқхўжаев, меҳнат ва бандлик муносабатлари вазирлиги, инновацион ривожланиш вазирлиги ва Марказий банк вакиллари иштирок этди ҳамда журналистларни қизиқтирган саволларга жавоб берди.

Журналистлар Жаҳонгир Ортиқхўжаевдан Британиянинг Open Democracy нашрида эълон қилинган маълумотга изоҳ беришни сўради. Ушбу нашрда чоп этилган мақолада Tashkent City қурилиши лойиҳасида иштирок этаётган хорижий инвесторларга тегишли эканлиги айтилаётган айрим компаниялар аслида Жаҳонгир Ортиқхўжаевга алоқадор эканлиги баён этилган.

Тошкент шаҳар ҳокими ушбу саволга жавоб берар экан, қуйидагиларни маълум қилди:

«Akfa — Ўзбекистонда 20 йилдан бери фаолият юритиб келаётган энг йирик компания. У менга тегишли. Менинг ҳоким бўлишим тушимга ҳам кирмаган эди. Бу ҳақда ярим соат олдин билганман. Очиғини айтсам, 20 йиллик компания ва 31 минг нафар ходимни шундай ташлаб чиқиб кетиш осон эмас. Президент мени шаҳар ҳокими этиб тайинлаганида, компания бошқарувини бошқа шахсларга ўтказишим талаб қилинган, лекин компаниядаги улушимдан воз кечишим ҳақида айтилмаган», — дейди Ортиқхўжаев.

Ҳоким журналистларга қарата:

«Агар менинг Boeing компаниясида улушим бўлганида, нима деб ўйлайсизлар, ҳоким бўлиб улушимдан воз кечишим керакмиди? Ёки Apple компаниясининг акциялари қўлимда бўлганидачи?

Мен ҳозир Akfa’ни бошқармаяпман. Бошқарувни шогирдларимга топширганман. Лекин, ҳоким бўлганимдан кейин улушимни бировга бериб юбормайманку?».

Қайд этилишича, ҳозирги кунда «Akfa Group» га қарашли Akfa Dream World компанияси Tashkent City’да давлат тадбирлари учун мўлжалланган конгресс-холл қурилишига инвестиция киритган.

«Президентимиз Тошкентда давлат тадбирларини ўтказишга мўлжалланган конгресс-холл қуриш ҳақида топшириқ бердилар. Akfa Dream World мана шундай масъулиятли вазифани ўз зиммасига олди. Конгресс холл қуриб битказилганидан сўнг давлатга топширилади. Akfa бундан бир тийин ҳам даромад кўрмайди. Яъни бу қурилиш Akfa учун даромад манбаи эмас», — дейди Тошкент шаҳар ҳокими.