28 январь куни Бекободдаги қурилиши тугалланмаган болалар боғчаси ичида жойлашган 1-мактабга тегишли бўлган иситиш қозонхонаси (котельная) портлаши оқибатида бир киши ҳалок бўлди. Бу ҳақда «Дарё»га Бош прокуратура матбуот хизмати раҳбари Сурайё Раҳмонова маълум қилди.
Бекобод шаҳар, 5-даҳа, «Цементчи» МФЙда жойлашган боғчада олиб борилаётган қурилиш-монтаж ишлари давомида, боғча ҳудудида жойлашган 1-мактабга тегишли бўлган иситиш қозонхонаси (котельная) портлаган. Кучли портлаш ёлланма ишчилар қозонхона ёнидаги деворни кўтариш пайтида содир бўлган.
Портлаш оқибатида Т.Э. воқеа жойида ҳалок бўлган, Б.Р. эса ўрта оғирликдаги тан жароҳатлари билан шаҳар тиббиёт бирлашмасининг жонлантириш бўлимига ётқизилган.
Бекобод шаҳар газ таъминоти корхонасининг маълумотларига кўра, портлаш сув буғининг босими кўтарилиши оқибати келиб чиққан.
Дастлабки тергов ҳаракатлари шаҳар прокуратураси томонидан назоратга олинган.
Изоҳ (0)