Ўзбекгидроэнергонинг Туябўғиздаги мўъжизаси (фото)

Ҳеч кимга сир эмаски кейинги йилларда аҳолининг ижтимоий эҳтиёжларини қондириш хусусан газ, электр энергия ва ичимлик суви муаммоси долзарблашиб бормоқда. Айниқса электр токининг узлуксиз бўлиши ҳаётий зарур эҳтиёжга айланиб улгурган. Статистик маълумотларга кўра, сўнги ўн йил мобайнида аҳолининг электр энергиясига талаби қарийб ўн бараварга ошди. Бу эса, албатта ўзига хос муаммоларни юзага келтириб чиқаради. «Дарё» мухбири Тошкент вилоятининг «Туябўғиз» сув омбори қошидаги кичик ГЭС қурилишидан фоторепортаж тайёрлади.

2017 йил 18 май санасида Ўзбекистон Республикаси Президентининг «Ўзбекгидроэнерго акциядорлик жамиятини ташкил этиш тўғрисида»ги фармонига асосан «Ўзбекгидроэнерго» ташкилоти «Ўзбекэнерго»дан ажралиб чиқиб акциядорлик жамияти шакллантирилди. Ўзбекгидроэнергога устувор вазифалар қилиб қўйидагилар белгиланган:

•  гидроэнергетика салоҳиятидан самарали фойдаланиш;
• сув-энергетика ресурсларини бошқаришнинг ягона тизимини шакллантириш;
• мавжуд гидроэлектрстанцияларни техник ва технологик жиҳатдан қайта жиҳозлаш;
• бунинг учун хорижий инвестицияларни кенг жалб этиш ва шу асосда корхоналар ва аҳолининг электр энергиясига эҳтиёжини тўла қондириш.

Мана шу устувор вазифаларни ўз вақтида ва сифатли бажаришни ўз олдига мақсад қилган Ўзбекгидроэнерго 2017—2021 йилларда гидроэнергетикани ривожлантириш бўйича чора-тадбирлар дастурини амалга оширишни белгилаб олди. Жумладан, мазкур дастурга асосан 42 та янги ГЭС қурилиши ва 32 таси модернизация қилиниши режалаштирилган. Шу асосда «Туябўғиз» сув омбори, Катта Фарғона канали, Оҳангарон, «Тўпаланг» дарёсида «Заржоб-1» ва «Заржоб-2» кичик ГЭСлар каскади қурилишлари бошлаб юборилган.

Ана шу гидроэлектрстанциялардан бири Тошкент вилоятининг «Туябўғиз» сув омбори қошидаги кичик ГЭС қурилишидир. Бу ердаги қурилиш ишлари 2017 йилнинг июнь ойида бошланган. Мазкур ГЭСни «Гидропроект» АЖ лойиҳаси асосида TO‘PALANG HPD IRRIGATION SYSTEMS унитар корхонаси бунёд этмоқда. Объектнинг умумий қиймати 16,33 миллион АҚШ долларига тенг. Ушбу маблағнинг қарийб ярми чет эл инвестицияси ҳисобига молиялаштирилмоқда. 8,09 миллион АҚШ долларлик қисми эса «Ўзбекгидроэнерго» томонидан қопланмоқда.

Ускуналар Хитойнинг шу соҳага ихтисослашган машҳур компанияси DОNG FAN томонидан етказилди ва ўрнатилди. Мазкур ГЭС қуввати соатига 5,75 мегаватт электр энергиясини етказиб берувчи иккита катта генератор билан таъминланган. Бу дегани соатига 11,5 мегаватт узлуксиз электр энергия манбаи қурилди дегани. Бу ўз навбатида қишлоқ хўжалиги, саноат, ишлаб чиқариш ҳамда аҳолининг узлуксиз электр энергиясига бўлган талабини қондиради.

Лойиҳалаш институти томонидан режаси ишлаб чиқилган Туябўғиз ГЭСи янги барпо этилган қалдирғоч ГЭСдир. Қурилиш бошлангандан буён 270 нафар ишчилар ҳормай толмай меҳнат қилишмоқда. ГЭС битгач 22 киши доимий иш билан таъминланади. Қурилиш ишларига тажрибали бош пудратчи Асадов Бахшулло бошчилик қилмоқда. Лойиҳаларни Лойиҳалаш институтининг мутахассиси Сафар Холмўминов тақдим этган.