Фарғона вилоятининг Данғара тумани ҳокимининг қабулига ёрдам сўраб келган, ногирон фарзандлари бор аёлга ўша жойнинг ўзида 3 хонали уй берилди. Бу ҳақда «Дарё»га Ёшлар Иттифоқи Данғара туман кенгаши раиси Шаҳноза Ўринова маълум қилди.
Туманнинг Усмон Носир кўчасидаги уйларнинг бирида ижарада яшовчи Мафтуна Усмонова уй-жой масаласида ёрдам сўраб туман ҳокимининг қабулига кирган. Фуқаро мурожаати шу ернинг ўзида батафсил ўрганилиб, туман ҳокими Саидмурод Аминжонов томонидан Мафтуна Усмоновага 3 хонали уйнинг калити топширилган.
— Халқ таълими бўлимида ишлайман. Зуҳрахон ва Ҳасанжон исмли ногирон фарзандларим бор. Анча вақтдан буён болаларим билан ижарада яшардик. Туманимизда қурилаётган арзон уй-жойлардан хонадон олишда ёрдам сўраб ҳоким қабулига кирдим. Кутилмаганда ўша жойнинг ўзида янги уй беришди. Хурсандлигимдан йиғлаб юбордим, — дейди Мафтуна Усмонова.
Маълумот учун, 2018 йилда Данғара туманида ҳар бири 18 хонадондан иборат 4 та кўп қаватли, 8 та 4 сотихли, 45 та 2 сотихли арзон уй-жой қурилган. Ушбу уйларнинг 20 таси ногиронлиги бор шахсларга, 2 таси фаол ёшларга берилган.
Айни пайтда 24 хонадонга мўлжалланган 1 та кўп қаватли, 12 та 2 сотихли уйларнинг қурилиш ишлари бошланган.
Изоҳ (0)