Лос-Анжелесда АҚШ актёрлар гильдиясининг 25-тақдирлаш маросими бўлиб ўтди. Бу ҳақда РБК хабар берди.
Асосий ва иккинчи даражали ролларнинг энг яхши ижроси учун бош мукофотни «Қора пантера» фильми эгаллади. Унда Чедвик Боузман, Майкл Бакари Жордан, Люпита Нионго, Данай Гурира каби актёрлар рол ижро этган. Фильм ўтган йилнинг февраль ойида сотувга чиққан бўлиб, 1 миллиард доллар фойда кўрган.
«Богемская рапсодия» фильмида Фредди Меркюри ролини ижро этган Рами Малек энг яхши актёр мукофотини олди. У ҳам «Оскар» мукофотига номзод этиб кўрсатилган.
Энг яхши актриса мукофоти эса Гленн Клоузга «Жена» (Рафиқа) фильмидаги роли учун берилди.
Киноактёрлар гильдияси — Америка кино саноати соҳасида фаолият юритувчи 150 мингдан ортиқ актёр, журналист ва радиобошловчилардан иборат. Мукофотлаш жараёни 1995 йилдан бошланган бўлиб, уларнинг барча аъзолари ғолибларни танлаш ҳуқуқига эга.
Жорий йилда «Оскар» мукофотини топшириш маросими 24 февраль куни Лос-Анжелесда бўлиб ўтади.
Изоҳ (0)