Канада ва Норвегия дунёдаги энг баланд буғу ҳайкали борасида баҳслашмоқда

Канаданинг Мус-Жо шаҳарчасида 1984 йилда Мак исмли улкан буғу ҳайкали ўрнатилган. Бетондан тайёрланган буғунинг оғирлиги тўққиз тоннани, баландлиги эса 9,7 метрни ташкил қилган. 30 йил давомида бу дунёдаги энг баланд буғу ҳайкали ва шаҳарчанинг энг асосий ёдгорлиги бўлган, деб ёзмоқда Meduza.

Норвегия 2015 йилда ўзининг буғу ҳайкалини ўрнатди ва барчаси ўзгарди. Ҳайкал пўлатдан қуйилган ва Ослодан Трондхеймга борадиган трасса бўйида ўрнатилган. Йўл хизматининг фикрига кўра, ҳайдовчилар ҳайкалнинг олдида тўхтаб дам олади ва шу тариқа тезлик пасаяди, ЙТҲлар камаяди. Стурелген номини олган буғу Канададаги Макдан 30 сантиметр баланд бўлган ва шу тариқа унинг дунёдаги энг баланд буғу ҳайкали мақомини олиб қўйган. Стурелгенни лойиҳалаштирган норвегиялик рассом Линда Баккенинг маълум қилишича, у ўз ҳайкалини атайлаб Макнинг ҳайкалидан баланд қилган.

Канадаликлар тўрт йил бунга муносабат билдирмади. Бироқ яқинда блогерлар Жастин Ривз ва Грег Мур видео ёзиб, унда норвегияликларнинг ишини ҳақорат, миллий ғурурга суиқасд деб атаган. Улар Мус-Жо шаҳарчаси мери Фрайзер Толмидан Макнинг баландлигини 31 сантиметрга ошириш ва «Ослонинг бурнини ерга ишқаб қўйиш» учун бирор нарса ўйлаб топишни талаб қилган.

Толми жим турмасдан, шаҳар аҳолисини ва бутун канадаликларни Макни қандай қилиб баланд қилиш ҳақидаги ўз таклифларини жўнатишга чақирган.

Мернинг айтишича, шаҳар аҳолиси ҳайкалнинг баландлигини ошириш учун аллақачон кўплаб таклифлар берган. Улар орасида буғуга коньки ўрнатиш, шляпа кийдириш ёки энг оммабоп бўлган унинг шохини узунлаштириш каби таклифлар мавжуд. Блогерлар эса ўз навбатида созъдан ишга ўтиб, GoFundMe сайтида Макни баландроқ қилиш учун маблағ йиғиш бўйича кампанияни ишга туширган. Белгиланган мақсад — 50 минг доллар. Биринчи беш кун ичида улар 2500 доллар тўплашга эришган.

Бу вақтда эса норвегияликлар Канаданинг рекордни қайтариб олиш режасидан хабар топди. Стурелген жойлашган Стур-Элвдал коммунаси раҳбарининг ўринбосари линда Хенриксеннинг маълум қилишича, уларнинг буғуси дунёдаги энг баланд бўлиб қолиши учун бор имкониятни ишга солишга тайёр. Шаҳар мерияси ходимининг сўзларига кўра, ҳайкал конструкцияси уни 20 метргача кўтаришга имкон беради. Фақат буни ҳайкал муаллифи Линда Баккенинг розилиги билан қилиш мумкин. Ижодкор эса Канада ёки бошқа давлат бўладими, ҳақини тўласа, Норвегиядагидан кўра баландроқ ҳайкал ясашга тайёр эканлигини маълум қилган.