Маданият вазири инвестиция лойиҳаларни таклиф қилиш учун қувайтлик фуқаро Амир Жафар билан учрашди

15 январь куни Маданият вазири Қувайт давлатидан ташриф буюрган Амир Жафарни қабул қилди, деб хабар берди Маданият вазирлиги матбуот хизмати.

«Учрашувнинг асосий мақсади Қувайтдан инвестиция жалб этишдир.

Амир Жафар Ўзбекистонга тез-тез ташриф буюрувчи меҳмонларимиздан биридир, миллий мусиқамиз шайдоси.

Шуни таъкидлаш жоизки, у ҳар гал Тошкентга келганида Ўзбекистон давлат консерваториясини кўздан кечиради, чунки консерваторияда таълим бераётган устоз муаллимларнинг дарс бериш маҳоратларини кузатишни ёқтиради. У бир неча марта Ёш симфоник оркестримизни Қувайт давлатига гастрол сафарини уюштирган», — дейилади хабарда.

Маданият вазирининг таклифига кўра, унинг асосий мақсади Қувайтда ва Ўзбекистонда ўзбек-араб мусиқа мактабини ташкил этишдир. Суҳбат давомида, у доим ўзбек мумтоз мусиқасидан баҳраманд бўлишини, шунингдек, 14 январь куни «Халқлар дўстлиги» саройида Миллий гвардия оркестри томонидан намойиш этилган ижро уни хайратда қолдирганини эътироф этди.

Маданият вазири Бахтиёр Сайфуллаев Амир Жафарга бир нечта инвестиция лойҳаларини таклиф этди, дейилади хабарда.