Қорақалпоғистонда ОТМлар сони 8 тага етди (фото)

11 январда Нукусда Ўзбекистон давлат жисмоний тарбия ва спорт университети ҳамда Самарқанд ветеринария медицинаси институтининг филиали очилди. Бу ҳақда ЎзА хабар қилди.

«Ушбу филиалларнинг очилиши халқимиз, ёшларимиз учун ажойиб совға бўлди. Янги филиалларда талабалар билим олиши учун барча шарт-шароитлар яратилган», — дейди Қорақалпоғистон Жуқорғи Кенгеси қўмита раиси Довутбай Қурбаниязов.

Ўзбекистон давлат жисмоний тарбия ва спорт университети Нукус филиалига 50 нафар, Самарқанд ветеринария медицинаси институти Нукус филиалига эса 30 нафар талаба қабул қилинган. 11 январдан ўқиш бошланган.

Янги филиалларда ўқув аудиториялардан ташқари, лабораториялар, замонавий компьютерлар билан жиҳозланган хоналар ва ахборот-ресурс маркази мавжуд. Бундан ташқари, муассасалар зарур адабиётлар ва спорт инвентарлари билан ҳам таъминланган.

Эслатиб ўтамиз, шу кунга қадар Қорақалпоғистонда 6 та олий таълим муассасаси фаолият юритиб келаётган эди.