Жефф Безоснинг ажрашиш сабабларини маълум бўлди
Amazon компанияси асосчиси Жефф Безоснинг рафиқаси билан ажрашишига унинг собиқ телебошловчи Лорен Санчез билан муносабатлари сабаб бўлган. Бу ҳақда Page Six нашрига таяниб, «РИА Новости» хабар берди.
Аввалроқ дунёнинг энг бой кишиси ва унинг рафиқаси Маккензи 25 йиллик турмушдан кейин ажрашишга қарор қилгани ҳақида хабар берилган эди. Жуфтликнинг уч нафар ўғли ва бир нафар асраб олинган қизи бор.
Безосни Санчез билан 2018 йилнинг октябрь ойида бирга кўришган. Нашр томонидан қайд этилишича, Санчез собиқ эри Патрик Уайтселл билан ажрашганидан кейин миллиардер ва телебошловчи тез-тез мулоқот қиладиган бўлган.
Безос ва Санчез «Олтин глобус» мукофотини топшириш маросимида ва шу куни Лос-Анжелесда ташкил қилинган Amazon компанияси кечасида ҳам бирга иштирок этган.
Нашр томонидан қайд этилишича, бу жуфтлик учрашиб туради ва миллиардернинг амалдаги рафиқаси уларнинг муносабатидан хабардор.
