Хоразм вилояти ҳокими айрим ҳудудларда ҳафталаб электр энергияси бўлмаслигини изоҳлади

Нима сабабдан республиканинг айрим ҳудудларида уч-тўрт кун, айрим ҳолларда ҳафталаб электр энергияси бўлмайди? Ушбу савол билан ЎзА мухбири «Бир саволга бир жавоб» лойиҳаси орқали Хоразм вилояти ҳокими Фарҳод Эрмановга мурожаат қилди.

— Хоразмда аҳоли электр энергияси таъминотидаги муаммолар юзасидан кўп мурожаат бўлади. Тармоқдаги узилишлар нафақат аҳоли хонадонлари, ҳатто ижтимоий объектлар, шифохона ва мактабларда ҳам кузатилмоқда. Вилоятда уч-тўрт кун, айрим ҳолларда ҳафталаб электр энергияси бўлмаслигини қандай изоҳлайсиз?— Хоразм вилоятида жами 348 мингдан ортиқ аҳоли хонадони электр истеъмолчиси, 18,4 мингдан ортиқ улгуржи электр истеъмолчилари мавжуд бўлиб, уларни бир соатлик электр энергиясига бўлган талаби 260 - 270 мегаваттни ташкил қилади.

Бу электр истеъмолчилар асосан Урганч шаҳрида жойлашган «Хоразм» 220/110/10 киловатт кучланишли подстанцияга ўрнатилган иккита ҳар бири қуввати 125 МВА бўлган автотрансформатор орқали таъминланган.

Бу автотрансформаторларнинг ўтказувчанлик қуввати 210 мегаваттни ташкил қилиб, 50—60 мегаватт электр энергия қуввати етишмас эди. Бу эса аҳолининг ҳақли эътирозларига сабаб бўлиб келган.Бу вазиятни тўғрилаш учун «Хоразм» 220/110/10 киловатт кучланишли подстанция реконструкция қилиниб қуввати 200 МВА бўлган қўшимча автотрансформатор ўрнатилди.

Шу билан бирга, Ўзбекистон Республикаси Президентининг 2016 йил 2 июндаги қарорига асосан вилоятдаги электр энергияси истеъмолчиларини электр энергияси таъминотини яхшилаш мақсадида 2019—2020 йилларда Хоразм вилоятига қўшимча равишда «Тахиатош—Хоразм—Саримай» 220 киловатт кучланишли ҳаво линияси қурилиши режалаштирилган.

Бунинг натижасида вилоятга қўшимча равишда 100 мегаватт электр энергияси қуввати билан таъминлаш имконияти мавжуд бўлади.Ушбу кўрсатилган топшириқлар ҳал бўлгунга қадар Президент Шавкат Мирзиёев томонидан 2018 йил 1 декабрдан бошлаб Туркманистон Республикасининг Тошховуз вилоятидан Хоразм вилоятига соатига 100 мегаватт электр энергияси импорт қилиш масаласи ижобий ҳал қилинди.

Бунинг натижасида истеъмолчиларга электр энергияси етказиб бериш яхшиланиб, электр энергияси бўйича узилишлар бартараф қилинди.