Саудия Арабистонида ўнлаб «ташландиқ» бизнес самолётлари борлиги аниқланди
Саудия Арабистонида қиймати юз миллионлаб доллар турадиган ҳамда алоҳида шахсларга ёки чартер компанияларга тегишли бўлган ўнлаб самолётлар аэропортларда тургани ва парвоз қилмаётгани маълум бўлди. Бу ҳақда Reuters агентлигига таяниб, «Ведомости» хабар берди.
Агентликнинг ёзишича, бу ҳолат Саудия Арабистонининг меросхўр шаҳзодаси Муҳаммад ибн Салмон томонидан ўтказилган антикоррупцион кампания мамлакатнинг элита қатламини қўрқитиб қўйганини кўрсатмоқда.
Самолётларнинг бир қисми уларнинг собиқ эгалари томонидан уларга нисбатан айб эълон қилинмаслиги учун давлатга топширилган. Бошқалари эса мамлакатдан чиқиб кетиши тақиқланган саудияликларга ёки ҳукуматнинг эътиборини тортмаслик учун ўз бойлигини кўрсатишдан қўрқаётган кишиларга тегишли.
Қайд этилишича, бу ҳолат сабабли мамлакатда тахминан 70 та Bombardier ва Gulfstream бизнес самолёти учмаяпти. Бундан ташқари уларнинг ичида йирик Airbus ва Boeing самолётлари ҳам мавжуд. Мамлакатда 2018 йилнинг якунига кўра жами 129 та шахсий самолёт бор.
