Қарши шаҳрининг «Ойдин» маҳалласидаги яқинда аҳолига топширилган арзонлаштирилган кўп қаватли уйларнинг «мис»и чиқди. Унда яшовчи аҳолининг айтишича, кўчиб келишганига бир ой бўлган бўлса-да, ҳалигача меъёрдагидек ичимлик суви билан таъминланмаган. Журналист Отабек Қўлдошевнинг «Дарё»га маълум қилишича, уйнинг орқа томонидан оқаётган ичимлик суви эса 3 кундан бери исроф бўлмоқда.
«Кўчиб келиб жойлашганимизга бир ой бўлган бўлса-да, шу бир ой ичида уч ёки тўрт кун сув беришди, холос. Унда ҳам ўйнатиб, бир ўчириб, бир қўшиб сув беришди, — дейди 5-уйда яшовчи аҳоли вакилларидан бири Феруза Бўронова. – Янги йилни ҳам сувсиз кутиб олдик. Байрам кунида сув беришмагани ёмон бўлди. Энг ёмони мана уч кундирки, «дом»имизнинг пастки томонида қувур ёрилгани сабаб сув оқишдан тўхтамаяпти. Айтишларича, қувур тешилган экан. Янги қувур қандай қилиб тешилиб қолиши мумкин?»
«Ойдин» маҳалла ҳудудида қурилиб, фойдаланишга топширилган 7 та кўп қаватли уйларнинг қурувчиси «Қурилиш сервис» МЧЖ масъули Ихтиёр Қурбонов мазкур ҳолатдан хабари борлигини айтар экан, бу хусусида мутасаддиларни 3 кун олдин огоҳлантирганлигини билдирди.
«Сув қувури ўтган 4 январь, жума куни ёрилган эди, — дейди Ихтиёр Қурбонов. – Ўша куниёқ масъулларга билдирдик. Аммо бугун (6 январь, якшанба) учинчи кундирки, келиб тузатишмади. Ичимлик суви эса кўчага оқаяпти. Энг ёмони сув уйнинг пастки қисмига зарар етказиши мумкин. Шу сабабли сувни бошқа томонга оқиздик. Аммо бу вақтинчалик чора. Тезда муаммони ҳал қилмасак бўлмайди».
Аҳоли вакилларининг сўзига кўра, уч-тўрт кун сув берилган пайтда ҳам сув беш қаватли уйнинг 2-қаватигача чиққан, тепа қаватларга сув чиқмаган.
«Сув келса ҳам фақат 2-қаватгача чиқади, — дейди шу уйнинг 5-қаватида яшовчи Соҳибжамол Аминова. – 3-, 4-, ва 5- қаватда яшовчилар айбдорми ёки? Масъулларнинг айтишича, сувни тепага чиқазиб берувчи моторнинг «мия»си кетган экан».
«Мия» кетганига бир ой бўлди, — дейди Шаҳноза Халилова. — Бу «мия» деганлари соз бўлганмикин ўзи? Чунки уйни қабул қилганимизга энди бир ой бўлди-ку?»
Ширкат раиси Азиз Халиловнинг маълумот беришича, 5-уйда 45 та хонадон бўлиб, айни кунга қадар кўчиб келган аҳоли ичимлик суви берилмаётганидан ташвишда.
«Бу муаммо юзасидан ҳатто вилоят ҳокимлигига ҳам хабар бердик, — дейди Азиз Халилов. – Келамиз дейишган. Кутаяпмиз».
Журналист Отабек Қўлдошевнинг маълум қилишича, 6 январь куни тушликдан сўнг масъуллар келиб, дарё бўлиб оқаётган сувни тўхтатган. Сўнгра ёрилган қувурларни тузатишган. Аҳолига сув ҳам узатилган, аммо носоз мотор туфайли сув ҳали ҳам 2-қаватдан юқорига кўтарилмаяпти.
Изоҳ (0)