АТК вазирлиги Ўзбекистондаги барча мобил қурилмаларни рўйхатдан ўтказишни таклиф қилмоқда

Ахборот технологиялари ва коммуникацияларини ривожлантириш вазирлиги мобил телефонлар ва мобил алоқа модулига эга қурилмаларни рўйхатдан ўтказиш мажбуриятини юклайдиган ҳукумат қарори лойиҳасини тақдим этди. Бу ҳақда «Podrobno.uz» хабар бермоқда.

Қарор лойиҳасига кўра, барча фойдаланилаётган, олиб кирилаётган, сотилаётган ва ишлаб чиқарилаётган мобил телефонлар ҳамда мобил алоқа модулли қурилмалар (ноутбуклар, планшетлар, модемлар, банкоматлар, ақлли соатлар ва ҳоказо) рўйхатдан ўтказилади.

Бу билан вазирлик ҳузуридаги мобил қурилмалар IMEI кодларини рўйхатдан ўтказиш маркази шуғулланади. Жисмоний шахс бунинг учун ариза ва паспорт нусхасини тақдим этади (шахсан мурожаат қилганда).

Олиб кирилаётган мобил қурилмаларни рўйхатдан ўтказиш пуллик асосда амалга оширилади. Жисмоний шахс битта қурилма учун энг кам иш ҳақининг 10, юридик шахс 5 фоизини тўлайди.

Мазкур тартиб кучга киргунга қадар ишлатилаётган мобил қурималар бепул рўйхатдан ўтказилиши кўзда тутилмоқда.