Ўзбекистонда уч ойда аҳолидан 73,9 млрд сўмлик “яшил” энергия сотиб олинди

Ўзбекистонда қуёш панеллари ўрнатганларга 2026-йилнинг I чорагида 73,9 млрд сўмдан ортиқ субсидия берилди. Бу ҳақда Солиқ қўмитаси хабар берди.

Маълум қилинишича, жорий йилнинг дастлабки уч ойида 45,2 минг нафар жисмоний шахс электр тармоқларига ўтказилган қуёш энергияси учун 73 млрд 982 млн сўм давлат бюджетидан субсидия олган.

Субсидиянинг энг катта қисми қуйидаги ҳудудларга тўғри келмоқда:

• Бухоро вилояти – 16,5 млрд сўм;
• Хоразм вилояти – 13,3 млрд сўм;
• Қашқадарё вилояти – 9,1 млрд сўм.

Субсидия қандай олинади?

Субсидияни “Солиқ” мобил иловаси "Кешбэк ва имтиёзлар" хизматининг “Қуёшли хонадон” бўлимидаги “Картага пул ўтказиш” ойнаси орқали банк картасига ўтказиб олиш мумкин.

2023 йил 1 апрелдан “Қуёшли хонадон” дастури доирасида хонадонига қуёш панелларини ўрнатган жисмоний шахсларга қуёш панели орқали ишлаб чиқарилган ва ягона электр энергетика тизимига узатилган электр энергиясининг ҳар бир киловатт соати учун 1000 сўмдан субсидия ажратилиши белгиланган. Яъни, қуёш панеллари орқали ишлаб чиқарилган ортиқча электр энергияси бир кВт/соати учун 1 000 сўмдан давлат томонидан сотиб олинади. 2024-йилда “Қуёшли хонадон” дастури доирасида фуқароларга 12 миллиард сўмдан ортиқ, 2025-йилда эса 209 млрд сўмдан ортиқ субсидия берилган.