Ўзбекистон терма жамоасининг БААдаги Осиё Кубогида фойдаланадиган либослари тақдимоти ўтказилди

27 декабрь, пайшанба куни футбол бўйича Ўзбекистон терма жамоасининг янги либослари тақдимоти бўлиб ўтди, деб хабар беради «Дарё» мухбири.

ЎФА Халқаро алоқалар бошқармаси бошлиғи ўринбосари Олим Арифов Жако компанияси билан тузилган шартнома бўйича йиғилганларга қуйидагиларни маълум қилди: «Ўзбекистон футбол ассоциацияси терма жамоасига либос етказиб берувчи бир қатор компаниялар билан музокара ўтказиб, якунда Германиянинг JAKO компанияси билан шартнома имзолаганидан хабарингиз бор. Бу компания биз учун манфаатли бўлган шартлар асосида бизга либосларни тақдим қилмоқда. Миллий терма жамоа аъзоларига 116 хил либос ва аксессуарлар бепул тақдим қилинса, қолган терма жамоаларга 50 фоизли чегирма асосида формалар етказиб берилади».

«JAKO компанияси билан 3 йиллик шартнома имзоланган бўлиб, миллий терма жамоамиз Жаҳон чемпионати саралашида муваффақиятли қатнашса, шартнома муддати узайтирилади ва шартлари қайта кўриб чиқилади»— деди ЎФА Халқаро алоқалар бошқармаси бошлиғи ўринбосари.

Маълумот учун, JAKO («ЯКО») компанияси спорт экипировкалари (либос, оёқ кийим, аксессуарлар) ва инвентарларни ишлаб чиқаришга мўлжалланган компания бўлиб, унга Руди Шпрюгел томонидан 1989 йилнинг 1 ноябрида асос солинган. Айни вақтда JAKO («ЯКО») компаниясининг 40дан ортиқ мамлакатларда филиаллари мавжуд. Компаниянинг бош биноси Германиянинг жануби-ғарбидаги Холленбах округида жойлашган.

Ҳозирда Австрия, Бельгия, Нидерландия, Швейцария каби мамлакатларнинг бир қатор клублари айнан JAKO компанияси билан ҳамкорлик қилади.