Туркия ИШИДни тор-мор қилишга тайёрлигини маълум қилди

Туркия Суриядаги террорчилик ташкилот ИШИДни якка ўзи йўқ қилиши мумкин. Бу ҳақда «РИА Новости» хабар берди.

Туркия ташқи ишлар вазири Мавлуд Чавушўғлининг айтишича, Анқара бу борада бошқа мамлакатлар, Эрон ва Россия, шунингдек коалиция бўйича ҳамкорлар билан ҳамкорлик қилишга тайёр. Айни пайтда Сурия билан ҳамкорлик ҳақида гап кетмаяпти, қайд этди вазир.

Чавушўғлининг айтишича, Туркия ва Қўшма Штатлар АҚШ қўшинлари Суриядан чиқиб кетмасдан олдин Сурия можароси бўйича йўл харитасини охирига етказиш бўйича келишиб олган.

Аввалроқ, 25 декабрь куни Туркия раҳбари америкалик ҳамкасби Дональд Трампни Анқарага таклиф қилган. Ўшанда давлат раҳбарлари телефон орқали сўзлашувлар ўтказган. АҚШ аскарлари делегацияси шу ҳафтада Туркияга ташриф буюриши ҳамда ҳамкасблари билан қўшинларини Суриядан олиб чиқиш масаласини муҳокама қилиши кутилмоқда.

Туркия президенти Ражаб Тоййиб Эрдўғон ноябрь ойида Суриядаги Манбиж шаҳрида Туркия ва АҚШ ҳарбийлари қўшма патруль бошлаганини билдирди. Бундан олдин, Эрдўғон октябрь ойида Сурияда террорчиларни йўқ қилишга ваъда қилган.

ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан «террорчилик ташкилоти» деб топилган.