Грузия фуқароларининг жами 1,5 млрд долларлик кредитларидан кечилади

Грузия ҳукумати Грузия фуқароларининг жами қарийб 1,5 миллиард долларлик 1,3 миллионта кредитидан кечади, деб ёзади Tengrinews.

Банклар ва микромолиявий ташкилотлардаги қарзлари кечиладиган Грузия фуқаролари сони 605 минг кишигача етди. Улар жами қиймати 3,9 миллиард лари (1,5 миллиард доллар)га тенг 1,3 миллионта кредит олган.

Қарзлардан 31 декабргача кечилади. Рўйхатга ўнлаб банклар, шунингдек, турли микромолия ташкилотлари, онлайн-банклар ва коллекторлик компаниялари қарздорлари кирган.

Грузия ҳукумати «қора рўйхат»га кирган фуқароларнинг қарзларидан кечишни ноябрдаёқ эълон қилган эди. Ушбу рўйхатга кредитлар бўйича фоизларни ўз вақтида ёки умуман тўламаётган фуқаролар киритилмоқда. Бундай ҳолатларда катта жарималар солинади ва умумий қарздорлик ошиб боради. «Қора рўйхат»даги фуқароларга мамлакатдаги бирорта ҳам банк бошқа кредит бермайди.