Ўзбекистон Хотин-қизлар қўмитасининг 22 декабрь, шанба куни Президент ҳузуридаги Давлат бошқаруви академияси биносида бўлиб ўтган ҳисобот-сайлов конференциясида Ўзбекистон бош вазири Абдулла Арипов ҳам сўзга чиқди, дея хабар бермоқда «Xabar.uz».
Бош вазир ўз нутқида раҳбар кадрлар орасида аёлларнинг камлиги масаласига тўхталди. Хотин-қизлар қўмитаси раиси Танзила Норбоеванинг сўзларига кўра, раҳбарлик лавозимда ишлаётганлар орасида аёллар улуши 1 фоизни ҳам ташкил этмайди.
«Мана шу даргоҳда вазирликлар берган рўйхатлар асосида раҳбар кадрларни тайёрлашади. Рўйхатларда ўнтадан битта аёл бўлади ё бўлмайди. Шуни ҳисобга олган ҳолда, Хотин-қизлар қўмитасини ҳам тавсия берадиган ташкилотлар рўйхатига қўшсак», — деб айтган бош вазир.
Шунингдек, Абдулла Арипов ўз нутқида аёллар жамиятнинг катта қисмини ташкил этиши, уларга муносиб иш ўринлари яратиш ҳақида ҳам сўз юритган.
Эслатиб ўтамиз, қўмитанинг ушбу ҳисобот-сайлов конференциясида Танзила Норбоева кейинги беш йил муддатга Хотин-қизлар қўмитаси раиси этиб қайта сайланган.
Изоҳ (0)